بعض البشـر لا قـــال كلمــه سمعنــــاه
وبعـض البشــر مـا نــسمعه لو ينــادي
وبعض البشر لو غاب لحظــه فقـدنــاه
وبعـض البشر لو غابت سنــيـن عادي
وبعض البشــــر لا راح عــنّـا لحقنـــاه
لــو بينــــنا وبــينـــــه ثمانـيــــن وادي
وبعض البشــــر لو ما قعدت انت واياه
ان قلــت : وينــك ؟ قال : بين الايــادي
وبعض البشر في ســـــاعة الفود نلقاه
وبعض البشـــــر لا فــادنا ولا استفادي
وبعض البشر مركى هل الطيــب مركاه
وبعض البشــــر مــركــاه بين النوادي
وبعض البشــر دايم على الخير مسعاه
وبعض البشــــر مسعاه خبص العبادي
وبعض البشــــر ما يندرى وين ممشاه
مثل الفحل لا صــــار وقــت الهــــدادي
وبعض البشـــر واللـــه لو يسرح بشاه
لا ينعــــرف ولا ينـــدرى ويــن غــادي
وبعض البشـــر لو مـــات عايش بذكراه
وبعض البشــر ذكــــــراه وقت الحدادي
وبعض البشـــر عقب العزا بيوم ننساه
وبعــض البشر نلبس عليــــه السوادي
وبعـــض البشر روس العــلالي توطاه
وبعـض البشــر من قــاع وادي لوادي
وبعض البشــر ما تنطــق العيبه اشفاه
وبعض البشــر العيب امـــر اعتيـادي
وبعض البشـــر نص الدلو صعـب يملاه
وبعض البشــــر محيـــط هندي و هادي
وبعض البشــــر ما يغيـــّر الوقت مبداه
وبعض البشــــر مـ يعرف معنى المبادي
وبعض البشر بين الحضــــر والبدو تاه
لا اهل الحضــر عرفوه ولا اهل البوادي
وبعــــــــــض البشــــر والله والله والله
لو ينشــــــرى بملـيون تشــريه عادي
الكفـــو يلقـى له خـــــــوي كفـــو يكفاه
والا الــــردي يزبــــن علـــى كل حادي
المــــرجله والطــيب والديـــــن والجاه
أجنــــاد للي ما لقــى لــــه جنــــادي
